A recta final das obras de mellora enerxética no CEIP O Carballal marcará o inicio do curso para o día 16 de setembro

A recta final das obras de mellora enerxética no CEIP O Carballal marcará o inicio do curso para o día 16 de setembro

A alcaldesa de Marín, María Ramallo, e o xefe territorial de Educación da Xunta de Galicia en Pontevedra, César Ares, visitaron esta mañá as instalacións do CEIP O Carballal, no que se están ultimando as obras de rehabilitación enerxética, executadas pola Consellería de Educación por un importe de 656.817,04 euros.

Esta importante actuación suporá a mellora da eficiencia enerxética para o centro educativo, incluíndo o illamento exterior da fachada, instalando ademais novas ventás e persianas e reparando e pintando os paramentos interiores.

A pesar do bo ritmo que levaron os traballos desde o seu inicio, e que están enmarcados no Plan de Dotación de Infraestruturas Educativas de Galicia 2016/2021, as circunstancias propias dun ano tan complexo coma este fixeron que os prazos de finalización da mesma sexan algo máis dilatados, debido á necesidade que houbo de cumprir e adoptar todos os protocolos de limpeza, hixienización e prevención da Covid19.

Debido a isto, a alcaldesa da vila adiantou durante a visita que se posporá uns días o inicio de curso neste centro escolar, concretamente até o 16 de setembro, coincidindo coa volta ás aulas do alumando de Educación Secundaria. Esta reincorporación dos escolares do Carballal tamén será progresiva e está previsto que a próxima semana se lle remita toda a información correspondente ás familias.

Ademais, tal e como adiantou a concelleira de Educación, Marián Sanmartín, o centro escolar ten todo xa preparado para que cando arranquen as clases no centro tamén o fagan dous dos servizos que presta, o Plan Madruga e o comedor. En todo caso, a demanda de ambos viuse reducida por mor da situación sanitaria, o cal, á súa vez, permitirá que se poña en marcha con máis facilidade ao ter un número de nenos usuarios menor.

Todas as actuacións combinadas que se están a executar no marco das obras suporán un aforro enerxético anual para o centro dun 24,19% en consumo de enerxía primaria e dun 26,52% en emisións de CO2, e redundará nun maior confort térmico para esta comunidade educativa.

Anterior O Concello reuniuse con representantes das direccións e das Ampas dos centros educativos de Infantil e Primaria para afrontar conxuntamente o inicio de curso

WEBS ASOCIADAS

CONTACTO

Avda. Ourense s/n

2022 Concello de Marín. Todos los derechos reservados