Contacto | Tel.:986 88 03 00

A Ruta Montes e Praias celebrará a súa edición máis especial

Novidades no itinerario, unha data moi especial e solidariedade. Eses son os ingredientes da sexta edición da Ruta Montes e Praias de Marín, presentada este mediodía no espectacular Banco de Pastoriza, por parte da concelleira de Turismo, Cristina Acuña, e os representantes da AECC e da Asociación Xesteiras.
A andaina deportiva, que está incluida no circuito Open de Andainas de 25 Km de Galicia, terá lugar o 8 de marzo, Día Internacional da Muller, con saída ás 09.00 horas da Alameda. O papel das mulleres na sociedade será un eixo vertebrador da actividade, que terá o seu reflexo nun concurso de lemas no que se unan o sendeirismo e a igualdade de xénero.
Segundo se explicou hoxe na presentación do evento, cada participante que se inscriba poderá escoller unha pequena frase que aparecerá no seu dorsal e que optará a ser o lema escollido finalmente para a ruta. Tamén se realizará un photocall con gran parte destas frases.
Un dos obxectivos que se persegue nesta nova edición é “superar o éxito da anterior”, xa que a finalidade última é a de recadar fondos para que a AECC de Marín poida continuar realizando a súa indispensable labor.

Novo itinerario
Segundo explicou José Francisco Gil, de Xesteiras, esta edición terá como alicienre a variación do itinerario con respecto a outros anos. “Imos variar un pouco o trazado propio da Ruta de Montes e Praias, incluindo algúns puntos que nos demandaba moito a xente como o Monte Pituco, o Lago de Castiñeiras ou a zona das Fervenzas do Neibóo, que seguro que lle descubrimos a moita xente”.
Aínda que a ruta pode chegar a ser dura, “a beleza das paisaxes compensa todo”, asegurou Gil. Así a todo, para aquelas persoas que prefiran un traxecto máis curto, está o trazado de 15 km, “que tamén subirá ata o Lago, pero despois xa baixara cara Marín sen dar tanta volta”. Neste caso, ademais, visitaranse as ruinas dunha torre medieval “que serán explicadas por un historiador”.

Inscricións
O prazo de inscrición xa está aberto na páxina www.25km.es e finalizará ás 00.00 horas do mércores, 4 de marzo. O límite de participantes será de 700 persoas e para as primeiras inscricións da ruta de 25 km haberá un prezo especial de 9 euros. A medida que se achegue a data, ese prezo ascenderá ata os 10 euros para os federados e ata os 13 para os non federados.
O prezo para participar na ruta de 15 km será, igual ca en pasadas edicións, de 5 euros e incluirá a posibilidade de solicitar as “bolsas do andarín”. 

Actividades paralelas
O domingo 8 de marzo será un día de frenética actividade na vila, dado que ademais da ruta, celebraranse os actos institucionais do 8M.
Por outro lado, ese día a Alameda acollerá a celebración da Festa do Bolo do Pote, que este ano estará organizada pola Asociación Pousos da Area, e que tamén será un atractivo para as persoas que rematen a ruta, que poderán probar o caldo e o tradicional bolo de pan que se cociña nesta festa.
Finalmente, o Concello traballa para optimizar ao máximo a organización da ruta e o coñecemento da mesma máis alá do exercicio. Por iso está previsto que se recollan os dorsais o sábado 7 e que haxa unha conferencia relacionada cas contornas que se visitarán ao día seguinte.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies