Contacto | Tel.:986 88 03 00

A Tesourería de Seguridade Social cede ao Concello o uso da primeira planta da Casa do Mar para fins sociosanitarios e asistenciais

O Concello de Marín e a Tesourería Xeral da Seguridade Social, dependente do Ministerio de Traballo, veñen de asinar un acordo de cesión de uso da primeira planta da Casa do Mar para que o municipio poida utilizar a infraestrutura con fins sociosanitarios e asistenciais.
Con este paso definitivo, o Concello consegue acadar un dos seus obxectivos a nivel social, que é poder reutilizar esa primeira planta do edificio para poder ofrecer servizos ás persoas maiores da vila, aproveitando o idóneo das súas instalacións e o céntrico da súa localización.
O inmoble, sito na rúa Ezequiel Massoni, ten unha superficie total construída de 2.092 metros cadrados e actualmente tiña esta primeira planta baleira, debido a que antes albergaba o centro de saúde, que agora conta cun edificio novo, inaugurado hai uns anos e cunhas prestacións moito máis acordes ás necesidades da poboación marinense.
No que se refire ao resto do edificio da Casa do Mar, o primeiro andar está transferido á Xunta de Galicia e destinado a servizos en materia educativa, de emprego e de formación profesional, encomendados ao Instituto Social da Mariña (ISM). Na segunda planta, están as oficinas da Dirección Provincial do ISM.
Agora, grazas á consecución deste acordo coa Tesourería, a primeira planta vai estar de novo en funcionamento. Para iso, o Concello de Marín asumirá todos os trámites e os custos derivados das obras de reforma e mellora da superficie, para adaptala ao fin sociosanitario que se lle quere dar. O presuposto inicial destes traballos ascende a 450.000 euros máis IVE. Asemade, o Concello asumirá os gastos de mantemento, de servizos e suministros e os impostos que así correspondan, incluído o IBI.
Con este novo paso, o Goberno local aspira a poder mellorar os servizos municipais que se lle ofrecen ao rango de poboación da terceira idade, que precisa de servizos e instalacións aptas para as súas necesidades, como é a atención asistencial.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies