Contacto | Tel.:986 88 03 00

Máis de 500 remeiros na Copa Galicia Concello de Marín

Dous centenares de remeiras e trescentos remeiros competirán o próximo sábado en augas de Marín na Copa Galicia Concello de Marín, inmersa na Semana Abanca. A cifra de 34 bateis con tripulación feminina supón un novo rexistro na historia do remo. Ás 15.00 horas comezarán as quendas, fronte ao Paseo Alcalde Blanco e está prevista unha cerimonia de clausura cerca das 18.00 horas. O evento presentouse hoxe no Concello de Marín e estiveron presentes a alcaldesa, María Ramallo; o concelleiro de Deportes, Antonio Traba, e membros da organización.

Coa organización do Club Marítimo de Vigo, a histórica Sociedade Deportiva Samertolameu, baixo o paraugas federativo da Galega de Remo, a Copa Galicia segue logrando unhas cifras de participación moi altas que ano a ano seguen crecendo.

Nesta ocasión, os clubs que se dan cita son Tirán, Moaña, Rianxo, Ares, Samertolameu, Meira, Narón, Cabo de Cruz, Bueu, Cangas, Mugardos, Coruxo, Chapela, Arealonga, Cabana e Mecos.

As categorías son alevíns, infantís, cadetes e xuvenís, tanto masculinas como femininas, e o único club que presenta un batel en todas as categorías é Cabo de Cruz-Boiro. Non obstante, os clubs de Tirán, Samertolameu e Chapela superan esta cifra ao presentar as súas filiais.

Trala competición, ás 19.00 horas, terá lugar no Auditorio do IES Illa de Tambo de Marín a quinta edición da Gala do Remo Galego, onde se entregarán 27 galardóns que serán a nivel de club, salvo cinco persoais. Os clubs de remo con máis premios son Miño de Tui, Mandeo de Bergondo e Remo Vigo, os tres con tres galardóns cada un. Por provincias, once premios son para Pontevedra, dez para A Coruña e un para Lugo, concretamente para o Club de Remo de Ribadeo.

Os premios máis destacados son para o coruñés José Manuel Saborido polo seu traballo na Esteirana e para Rodrigo Conde, o moañés do Club de Remo Miño de Tui, que realizou unha excelente tempada, logrando o billete para Tokio 2020.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies