Contacto | Tel.:986 88 03 00

Marín volve presentar candidaturas para a Rede de Sendeiros Azuis

O Concello de Marín vén de presentar un ano máis as candidaturas da Ruta das Praias, a Ruta dos Cinco Miradores e a Ruta Montes e Praias como Sendeiros Azuis. Esta distinción outórgaselles aos itinerarios que enlazan praias ou portos con Bandeira Azul e que contribúen, positivamente, ao uso sostible do litoral.

No caso da vila marinense, as tres candidaturas xa contaron este pasado ano ca catalogación de “Sendeiro Azul”, que aporta a ADEAC co apoio da Fundación Biodiversidade do Ministerio para a Transición Ecolóxica. Para o Concello, supón un recoñecemento ao traballo en mellorar e coidar este patrimonio litoral, segundo explicaron fontes municipais esta mañá.

Ademais, estes sendeiros, como é o caso da Ruta das Praias, supoñen un enorme atractivo turístico, dado que no seu percorrido pásase por puntos de interese como o Centro de Interpretación de Petróglifos de Mogor, o peirao de Aguete, a fábrica de salgadura de Loira ou a illa do Santo, ca súa antiga capela.

No caso da Ruta dos Cinco Miradores, os camiñantes poden atravesar lavadoiros e fontes singulares, típicas da arquitectura rural e patrimonial de Marín, como o da Moreira, ou cruceiros de enorme beleza, entre os que destacan os de Sete Espadas ou o de Areosa. O Monte Penizas e o Castro da Subidá tamén son dous puntos interesantes dentro do percorrido da ruta.

A Ruta dos Montes e Praias nace da demanda da veciñanza de poder contar cunha opción máis larga e que combine estes dous ecosistemas, dos que o concello marinense pode presumir.

Limpeza e mantemento do Viario de Praias

Conseguir distincións como as bandeiras e os sendeiros azuis ten detrás moito traballo de conservación, mantemento e limpeza das rutas, para que sempre se atopen no mellor estado posible.

Precisamente hoxe deron comezo os traballos, por parte da Fundación Juan XXIII, de limpeza e acondicionamento do viario de praias, que supuxeron o corte ao tráfico de 09.30 a 13.30 horas, unha restrición que se manterá mañá.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies