Contacto | Tel.:986 88 03 00

O Bolo do Pote, unha tradición gastronómica que volve á actualidade o próximo domingo

Degustar o bolo do pote non era ningunha novidade nin supoñía un acontecemento especial no tempo das nosas avoas. Pero agora, co avance do mundo industrializado e a mellora das condicións económicas, comer este alimento é algo que só se pode facer en citas gastronómicas como a que terá lugar o domingo, na Alameda, e que está enmarcada na programación para conmemorar o #8M, Día Internacional da Muller.

A concelleira de Cultura, Beatriz Rodríguez, e o presidente de Pousos da Area, Jose Iglesias, presentaron esta mañá esta nova edición, na que esperan repartir preto de 1.000 racións deste alimento. Tal e como explicou Iglesias, “nós seguimos a mesma receita dunhas mulleres de Pardavila, que tamén era a que seguían os membros de Fentos e Frouma, a asociación que ata hai uns anos organizaba a festa”.

O bolo do pote era moi típico das casas do interior, “como no caso das parroquias de Marín”, debido a que naqueles tempos “non era posible ter pan de diario. Había fornos comunitarios nos que podías ir facer pan unha vez á semana, pero tiña que durar fresco todo ese tempo”. Por iso, nas casas galegas, aproveitando que se facía o cocido, “cocían na auga do caldo este bolo, composto por fariña de millo e de centeno”.

Deste mesmo xeito, este sábado pola noite os voluntarios de Pousos da Area poranse mans á obra para facer o cocido e elaborar as racións de bolo do pote. “Leva moito tempo, porque non se poden apilar dentro da pota”, afirmou Iglesias. “É un traballo moi de valorar”, engadiu a concelleira, consciente do traballo e da implicación que supón sacar adiante esta cita gastronómica.

As racións poderán degustarse na Alameda, onde a partir das 13.30 horas estará habilitada a carpa. Dentro dos actos da programación do #8M tamén figura a celebración da andaina e da ruta deportiva Montes e Praias, que ten o seu remate na mesma Alameda, “polo que esperamos que moita xente se anime a comer unha ración e a coñecer máis sobre esta tradición culinaria da nosa vila”.

O grupo “Sara e Sofía” de versións de música actual encargarase da ambientación musical e tamén haberá varios postos de artesanía e venda de produtos gastronómicos galegos.

Por outra banda, a Asociación Santo Tomé de Piñeiro estará na outra banda da Alameda practicando cos rapaces o xogo de Urralas olas, típico do Domingo de Piñata, data fixada no Entroido galego.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies