Contacto | Tel.:986 88 03 00

O Concello de Marín asina coa Xunta de Galicia o acordo para a conversión do primeiro andar da Casa do Mar nun Centro de Día

O Concello de Marín e a Xunta de Galicia asinaron recentemente o convenio para a realización da remodelación do primeiro andar da Casa do Mar co fin de converter este espazo nun Centro de Día para a terceira idade.

Este inmoble foi cedido ao Concello por parte da Tesourería da Seguridade Social co obxectivo de garantir, por parte do Goberno municipal, a cobertura pública da asistencia da terceira idade, para o que esta infraestrutura resultaba de gran interese e pola que o Concello traballou intensamente para conseguir a súa cesión.

O convenio asinado achegará ao Concello 200.000 € por parte da Xunta de Galicia, como así adiantou a conselleira de Política Social, Fabiola García, o pasado 5 de febreiro na súa visita á Casa do Mar de Marín.

As obras de acondicionamento do primeiro andar da Casa do Mar serán executadas polo Concello, estando previsto que se dote a este Centro de Día dunha ampla sala de usos múltiples, así como doutras dependencias: un espazo de rehabilitación, outro para o lecer, cociña e lavandería.

O custo da conversión do edificio actual, situado na rúa Ezequiel Massoni, no centro para a terceira idade ascenderá a 300.000 €.

Dentro destes compromisos do Concello de Marín pola cobertura pública da asistencia social da terceira idade, tamén comezou a funcionar de forma permanente, o pasado mes de novembro, o Centro Terapéutico para Persoas con Alzhéimer da Finca de Briz, impulsado xunto con Afapo. Os usuarios deste centro tamén poderán ser beneficiarios do futuro centro de día cando a enfermidade avance e as dúas sesións á semana que se ofrecen en Briz sexan insuficientes.

A alcaldesa explicou nunha destas visitas ao inmoble da Casa do Mar a importancia deste tipo de actuacións, “dada a poboación que temos na nosa vila, na que a xente maior ten un peso moi importante e que precisa das mellores atencións, incluso cando os recursos son limitados” afirmou Ramallo.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies