Contacto | Tel.:986 88 03 00

O Concello executa pavimentacións en tres camiños de Santomé e Ardán moi utilizados pola veciñanza

O Concello de Marín anunciou a finalización da execución de tres camiños rurais, que precisaban dunha mellora estrutural para que puideran seguir sendo utilizados pola veciñanza.

Segundo concretou o concelleiro de Rural, Pablo Novas, as actuacións realizáronse no Camiño da Barronca e en Allariz, ambos ubicados na parroquia de Santomé de Piñeiro, e no Camiño de Moledo, en Ardán.

Nos tres casos, os traballos consistiron no formigonado de todo o camiño, renovando así o seu aspecto e mellorando a súa utilidade. No caso do Camiño da Barronca, habilitouse tamén unha canaleta e nos outros dous deixáronse a punto as acometidas domiciliarias de saneamento. Ademais, no caso do Camiño de Moledo resolveuse na medida do posible a pendente, excesivamente empinada, que existía.

“Os veciños demandaban que actuásemos no Camiño da Barronca, dado que é moi utilizado como atallo para poder recoller aos rapaces que chegan á parada do autobús”, explicou Novas. Neste caso, a obra foi acometida por Trafor, cun orzamento de 7.746 euros (máis IVE).

No caso do Camiño de Moledo, o concelleiro explica que dá servizo “a catro vivendas, que ata agora tiñan dificultades para o acceso polo mal estado que presentaba o camiño”. A empresa Hermanos Iglesias SL foi a encargada de executar o traballo, por un importe de 7.063 euros (máis IVE).

Finalmente, no que respecta ao camiño rehabilitado en Allariz, “trátase tamén dunha zona moi transitada polos veciños do lugar, ademais de conectar a tres vivendas e de dar acceso a unha casa de Turismo Rural que existe nesa zona”. Esta humanización foi levada a cabo pola empresa Viñas Blancas SL, por un importe de 10.327 euros (máis IVE).

Con estas actuacións, o Concello segue traballando na mellora das conexións no rural, onde os camiños supoñen unha vía de comunicación moi importante entre núcleos de poboación.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies