Contacto | Tel.:986 88 03 00

O Entroido de Marín saltará das rúas ás pantallas para adaptarse á situación sanitaria

16 xaneiro 2021

O 2021 segue estando marcado pola difícil crise sanitaria que estamos a atravesar, polo que teremos que seguir facendo esforzos e sacrificios para preservar a nosa saúde colectiva. Neste contexto, a celebración do Entroido de Marín debe cancelarse no que respecta ao seu formato habitual e procurar un xeito diferente de adaptarse a esta situación extraordinaria.

As concelleiras Beatriz Rodríguez, Itziar Álvarez e Marián Sanmartín mantiveron este venres unha reunión con representantes das asociacións que, en palabras de ambas, “son as que manteñen vivo o noso Entroido”, para abordar xunto a elas actividades alternativas coas que conmemorar estes días lonxe dos festexos multitudinarios que os caracterizaban.

Así, as edís do Goberno local trasladáronlle aos representantes das comparsas Os Da Caña e Os Paparrulos e das asociacións Ateneo Santa Cecilia e Amigos dos Rapaces a imposibilidade de realizar o Entroido como todos os anos e propuxeron a posibilidade de realizar unha serie de vídeos cos que trasladar a festa do Carnaval das rúas ás pantallas, poñendo en valor todas as citas de ocio e de cultura que marcan habitualmente estes días na nosa vila: a Festa do Merengue, a festa infantil, o Concurso de Filloas e Ourellas, o Bolo do Pote…

Ademais, o obxectivo é poder crear exposicións físicas que nos lembren que estaremos en tempo de Entroido e que poden ser visitadas cumprindo con todas as medidas de prevención, hixiene e control da pandemia.

Por unha banda, co Ateneo Santa Cecilia, impulsarase un pequeno velorio da sardiña, unha das cuestións máis signficativas do noso Entroido, no Multiusos da Praza de Abastos. “Está sobre a mesa que ese velorio poida extenderse a unha pequena mostra na contorna do Mercado, que irá apoiada tamén pola colocación das típicas banderolas do Enterro”, aseguraron as concelleiras. Ademais, a entidade cultural, tal e como adiantaron na reunión, organizará un concurso de debuxo para escolares sobre o Enterro da Sardiña.

No que respecta ás comparsas, realizarán unha exposición dos seus traxes máis emblemáticos no Museo Manuel Torres. Ademais, haberá unha mención especial para ambas pola súa longuísima traxectoria, xa que este ano O da Caña cumpren o seu 30 aniversario, unha data significativa que Os Paparrulos tamén celebraron no 2020. Tamén se procurará contar con outras comparsas que participaron do Entroido de Marín noutras épocas, aínda que agora non estean activas. Nos vídeos mencionados anteriormente, poderá contase coas batukadas destas comparsas, para que poidan realizar algún tipo de actuación musical.

A asociación Amigos dos Rapaces tamén recuperará a súa Festa do Merengue dun xeito dixital e alternativo, con decoración na praza o mesmo día e sobre todo coa súa inserción nunha das pezas audiovisuais que se realizarán. Segundo comentou a súa representante na reunión, tamén valorarán a posibilidade de crear unha escolma de fotos doutros anos que colgarán nas redes sociais.

 

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies