Contacto | Tel.:986 88 03 00

Ramallo e Novas visitan as obras de humanización de Camiño Vello en Seixo, que avanzan a moi bo ritmo

19 marzo 2021
A alcaldesa, María Ramallo, e o concelleiro de Rural, Pablo Novas, visitaron conxuntamente co responsable da empresa executora e cos técnicos municipais as obras de humanización do Camiño Vello de Seixo, que están a avanzar a moi bo ritmo e que suporán unha substancial mellora desta rúa en pleno casco urbano da parroquia marinense.
Tal e como lle explicaron os técnicos á rexedora e ao edil, parte dos servizos relacionados con abastecemento e saneamento xa están renovados e colocados, así como os trazados das novas beirarrúas.
O proxecto abrangue o tramo comprendido entre a rúa Doutor Otero Ulloa (estrada PO-551) e o cruce coa Estrada O Grupo Escolar de Seixo, coa finalidade de entroncar coa actuación que xa se realizou anteriormente até a estrada provincial EP-1202.
“Esta rúa atopábase en moi mal estado, tal e como incluso aínda se pode ver no pavimento que está por retirar e ao ser moi utilizada pola veciñanza, requería deste importante esforzo de humanización, para convertela nun espazo renovado e cómodo para o seu uso, con todos os servizos modernizados, xa que se producían moitas avarías polo seu deterioro”, explicou a alcaldesa a pé de obra.
Coa actuación, anchearanse as beirarrúas ata uns 2,50 metros (dependendo nalgúns puntos das fachadas de edificios anexos) e no que respecta á calzada, quedará o sentido único desde a Rúa Doutor Otero Ulloa ata o Mercado, con carril de 3,5 metros de amplitude.
No que respecta ao estacionamento, deixarase á beira de toda a marxe dereita do viario un espazo de máis de dous metros.
Tanto Ramallo como Novas mostraron a súa satisfacción ante a boa execución dos traballos, “que suporán unha mellora para a calidade de vida dos veciños de Seixo e unha reforma moi importante para o centro urbano da parroquia”, en palabras do concelleiro.
O proxecto está a subvencionarse coa liña do Plan Concellos da Deputación de Pontevedra, por un importe total de 374.361,63 euros.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies