Contacto | Tel.:986 88 03 00

A Asociación Cultural Musimarín estrea as súas novas instalacións

Despois de varios anos impartindo clases de música e realizando ensaios ca Banda na Finca de Briz, a Asociación Musical Musimarín poderá gozar a partir de outubro das súas novas instalacións, situadas no CEIP A Laxe.

O director da agrupación visitou onte o centro educativo xunto cas concelleiras Beatriz Rodríguez e Marián Sanmartín. Os alumnos da asociación poderán agora gozar tanto do espazo dunha das casas dos mestres que estaba sen utilizar, como de dúas aulas que de momento o colexio ten dispoñibles, e nas que tamén se realizarán ensaios. Asimesmo, a Banda de Música poderá utilizar o salón de actos do centro educativo.

“Desta maneira, Musimarín poderá seguir crecendo e acollendo a máis nenos nas súas clases e actividades”, explicou a concelleira Marián Sanmartín. Pola súa banda, a asociación mostrou o seu agradecemento “a todos os organismos que fixeron posible que esta escola poida ter novas instalacións”, entre os que están, ademais do Concello, o equipo docente do colexio, a ANPA e o equipo directivo, á fronte do cal está a directora Cristina Sanmartín.

Despois de diversas reunións entre todos os actores implicados, o Consello Escolar votou a favor, por unanimidade, do traslado de Musimarín á escola, o que supón un respaldo á labor que realiza a asociación “e unha aposta pola cultura musical”.

A asociación quixo tamén ter unhas palabras de agradecemento para os empregados e funcionarios de Servizos Sociais que traballan en Briz “por deixarnos compartir todo este tempo a nosa labor nesas instalacións”.

Na actualidade, a asociación conta con máis de 140 alumnos e cun equipo docente formado por 13 mestres.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies