Contacto | Tel.:986 88 03 00

Iniciada a plantación das árbores que ornamentarán á nova Avenida de Ourense

24 febreiro 2021

A humanización da Avenida de Ourense é un dos grandes proxectos da estratexia Marín Dusi, cofinanciada nun 80% polo Fondo Europeo de Desenvolvemento Rexional (FEDER) da Unión Europea.

Na vía coexistirán o tráfico peonil e o ciclista, coa creación dun carril bici que mellorará a mobilidade. O ancheamento das beirarrúas, a renovación do mobiliario e o cambio de toda a iluminación por unha que cumpra cos estándares de aforro enerxético serán os grandes eixos da humanización.

Tamén entra dentro do proxecto a remodelación do espazo verde e do arborado da vía. Precisamente, segundo explicaron fontes municipais, a primeira fase do paseo, desde a fronteira con Pontevedra, ten xa a súa execución moi avanzada e comezou ser obxecto da plantación das novas árbores, exemplares de seis metros de alto de perais en flor (Pyrus calleryanna president).

Nestes momentos xa están plantadas a metade das árbores desta primeira fase, para tratar de rematar canto antes este tramo de paseo. Os operarios da empresa adxudicataria, así a todo, xa están comezando a avanzar nas obras de humanización do segundo tramo, que vai desde a entrada ao Porto por Nodosa até a marquesiña da Praza de España.

No que respecta ás plantas, repartiranse no parterre do primeiro tramo, que está dividido por unha escaleira. A área máis grande mide aproximadamente 35 metros de largo. As especies elixidas que ornamentarán este espazo e que formarán parte das composicións serán distintos tipos de Nandina doméstica, de Leucothoe axillaris, Leucothoe scarletta e gramíneas como Muhlnbergia capillaris e algunha especie de Pennisetum alopecuroides.

En total, serán máis de 3.000 unidades de plantas que embelecerán a nova Avenida de Ourense, sendo especies elixidas polo bo aspecto que terán ao longo de todo o ano, cun mantemento sinxelo.

Por outra banda, o Concello asegura que pronto se poderán repoñer as dúas estatuas que xa figuraban na antiga avenida, a da carrexadora, de Ramón Conde, e a da parella.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies