Contacto | Tel.:986 88 03 00

Iniciadas as obras de instalación do ascensor no Museo Manuel Torres

O Museo Manuel Torres de Marín contará pronto cun ascensor, que permitirá acceder a todas as persoas ás súas instalacións. Este proxecto, tal e como indican desde o Concello, “satisfai unha demanda histórica entre a veciñanza, resolvendo unha débeda pendente”.
Hoxe comezaron as obras na fachada lateral, onde os operarios estiveron acompañados en todo momento polo técnico Juan Carlos Castro, da empresa Anta de Moura, encargada do control arqueolóxico da actuación.
O Goberno local leva traballando en sacar adiante este proxecto desde finais do ano 2016, cando se decidiu que a estrutura debía ir por fóra, “dado que polo interior non era viable, xa que non se cumpría coa accesibilidade e todas as opcións alternativas son moito máis complexas e custosas”, segundo os criterios técnicos.
A partir de entón, pedíuselle a correspondente autorización a Patrimonio, que se recibiu favorablemente, aínda que coa obriga de facer o control arqueolóxico que nestes momentos supervisa Anta de Moura.
Durante o proceso de axilización do proxecto, leváronse a cabo reunións periódicas ca comunidade de veciños afectada pola construción do ascensor, explicando o por que da decisión técnica de erixilo pola fachada, co obxectivo de sacar adiante a obra co consenso total con todas as partes afectadas.
Ademais, a integración do ascensor no espazo museístico contou co voto a favor unánime de toda a Corporación no Pleno de decembro do pasado ano.
O proxecto, que está executando a empresa Calicanto Obras y Proyectos SL ten un custe global de 42.063,78 euros (IVE incluído) e conta cunha subvención de Vicepresidencia da Xunta de Galicia.

Plan de Mobilidade Sostible

O Concello é consciente da necesidade de seguir dando pasos en pro da mellora da mobilidade e da accesibilidade do municipio, especialmente en aquelas infraestruturas públicas, como era no caso do museo.
Por iso, dentro da estratexia Marín 2020, financiada pola Unión Europea, a través dos Fondos Feder, o Concello está en proceso de implementar o seu Plan de Mobilidade Sostible, centrado na aposta por un transporte público limpo e na mellora das conexións entre o núcleo urbano e o rural e entre o centro marinense o os dous municipios cos que máis relación ten: Pontevedra e Bueu. Dentro desta liña tamén se engloban melloras na rede viaria, impulso do transporte ciclista e peonil e o desenvolvemento de sistemas de subministración de enerxías limpas.
Para todos estes obxectivos xerais, a Concellaría de Medio Ambiente e Benestar Social ten trazadas varias medidas concretas, como a definición do espazo público para que as bicicletas poidan circular con seguridade, a mellora da luminosidade naqueles puntos máis escuros da vila (sempre en base a criterios de eficiencia enerxética) ou a eliminación das barreiras arquitectónicas nos edificios da administración pública, como é o caso do Museo na actualidade e como será o caso do edificio do Concello no futuro.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies