Contacto | Tel.:986 88 03 00

O Concello e Afapo impulsan a implementación dun centro terapéutico en Briz para pacientes con Alzheimer

A alcaldesa de Marín, María Ramallo e a concelleira de Benestar Social, Marián Sanmartín, reuníronse esta semana co presidente da Asociación de Familiares de Enfermos de Alzheimer de Pontevedra (Afapo), José Manuel Fontenla Redondo, para anunciar a implantación dun centro terapéutico na Finca de Briz que lle dea servizo ás persoas que comezan a ter signos evidentes de progresión desta enfermidade.
Este centro compleméntase ca oferta de obradoiros de memoria que a asociación e o Concello veñen ofertando nos últimos anos, dirixidos a toda a franxa da terceira idade de maneira xeral.

No caso desta unidade asistencial, realizarase unha intervención integral a persoas cun deterioro cognitivo leve ou moderado e traballarase en grupos homoxéneos, de en torno a catorce usuarios cada un, nos que todos se sintan cómodos e adaptados ás esixencias das actividades.

Para isto, utilizarase a metodoloxía coñecida como PCP (Planificación Centrada na Persoa con Demencia), que planifica estratexias seguindo unha valoración inicial da persoa con Alzheimer e do seu círculo máis próximo.

Segundo os resultados que o equipo de Afapo consiga destas valoracións, configuraranse os grupos e comezará a intervención terapéutica no centro, que durará 12 meses. Serán sesións de tres horas, en horario de 10.00 a 13.00, dúas veces por semana.
Rematado este tempo, o equipo de Afapo realizará unha avaliación individual de cada participante, na que se incluirán entrevistas cos familiares, para coñecer así a evolución da persoa despois de ter practicado as actividades propostas.

De maneira concreta, as actividades que se realizarán no centro poden resumirse en tres tipos de obradoiros:
Obradoiro de estimulación cognitiva, dirixido a activar e manter as capacidades mentais de maneira integral, realizando accións de orientación á realidade, reminiscencia, memoria, lectoescritura…
Obradoiro de terapia ocupacional, para incentivar a realización das actividades típicas da vida diaria e traballando as capacidades sensoriais, perceptivas, cognitivas e motrices.
Obradoiro de psicomotricidade, onde se favoreza o dominio do propio corpo e o mantemento o máximo tempo posible das funcións que aínda se conservan.

O obxectivo xeral da programación é o de ralentizar, na medida do posible, o deterioro cognitivo e a perda de memoria, mobilidade e funcións motoras que presentas as persoas con Alzheimer e outras demencias.
Para a alcaldesa, María Ramallo, apostar pola prestación deste servizo de maneira pública “é básico nunha sociedade na que esta enfermidade está tan presente e na que os seus pacientes precisan dunha atención personalizada e adaptada ás súas necesidades”.
Ademais, con este apoio por parte de equipos expertos, como o de Asapo, conséguese aliviar a sobrecarga do coidador principal, proporcionándolle un tempo de respiro.
O obxectivo do Concello e de Asapo é que o obradoiro estea en pleno funcionamento a partir do próximo mes.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies