O Concello presenta o proxecto de creación do Centro de Ocio Xuvenil que albergará o Liceo Casino

23 xaneiro 2021

A xuventude é o futuro da nosa vila e por iso o Concello traballa en poder ofrecerlle a este rango de idade un espazo e unha programación didáctica que lles permita ter ofertas de ocio e culturais para o seu tempo de lecer.

Con esa ansia nace o proxecto que o Goberno local prepara para o Liceo Casino, adquirido polo Concello no verán de 2019, cuxa primeira planta será destinada á creación dun centro de ocio xuvenil multidisciplinar, orientado ás novas tecnoloxías e aos intereses dos rapaces e rapazas de entre 14 e 20 anos, aproximadamente.

A alcaldesa de Marín, María Ramallo, presentou hoxe o proxecto elaborado para a remodelación do espazo, “que queremos converter nun punto de reunión, especialmente durante o inverno, que tamén poda ofrecer cursos, charlas e outras modalidades formativas, centradas nas novas tecnoloxías tan necesarias para a xente nova”.

Segundo se extrae do proxecto, o centro contará cun amplo vestíbulo, que servirá como un espazo polivalente; unha sala de traballo e de estudo, unha sala de informática e unha sala de xogos e descanso.

No que respecta á planta baixa, que albergaba a sala de baile do antigo Liceo Casino, será destinada, tal e como xa se anunciara no momento da adquisición do local, a crear o arquivo municipal. Este espazo contará con arquivadores móbiles de accionamento mecánico e cun pequeno almacén. Tamén se prevé a instalación dun ascensor que facilite o acceso peonil como o traslado de cargas pesadas ao arquivo.

Ambos espazos, o centro de ocio e o arquivo, terán entradas independentes desde a Rúa Tiro Naval Janer. Este vestíbulo de entrada será retranqueado para gañar máis espazo tanto para o portal de entrada ás vivendas particulares do edificio como para poder así deixar dúas entradas para o centro de ocio e unha independente para o arquivo, de tal xeito que poidan funcionar separadamente.

O proxecto suporá cunha inversión de 376.956,85 euros. Ramallo asegura que a creación deste centro é “fundamental” para poder ofrecer á xuventude marinense “un lugar que lles sirva non só a nivel social, senón formativo e de dinamización, adaptado aos seus intereses e no que poidan desenvolver o seu potencial, namentres gozan dun tempo de lecer de calidade”.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies