Contacto | Tel.:986 88 03 00

O Museo Torres inaugurará o venres a exposición “Historia dos símbolos de España”

O Museo Manuel Torres de Marín acollerá desde o venres, 28 de febreiro, ate o 29 marzo, a mostra “Historia dos símbolos de España”, unha completísima exposición comisionada pola Asociación Retógenes (Amigos de la Historia Militar). O seu vicepresidente, Jesús Dolado, estivo acompañando hoxe ás concelleiras Itziar Álvarez e Marián Sanmartín no Museo, onde se están a levar a cabo os traballos de instalación desta mostra.

A asociación é propietaria de reconstrucións fidedignas e, en moitos casos, a tamaño real, de todas as bandeiras que forman parte da historia do noso país. Asemade, contan con bustos e miniaturas que realizan eles mesmos recreando a figuras históricas, ademais dunha importante colección de moedas e dun compendio de figuriñas de Playmobil customizadas, adaptadas cos traxes e cos símbolos propios de cada etapa histórica.

Con todo este material, o obxectivo que persegue a asociación é o de “poder mostrar a historia dos nosos símbolos, desmitificándoa e eliminando moitos dos mitos que se foron creando co paso do tempo e chegando a todo tipo de públicos”. Precisamente, as figuras de Playmobil están pensadas para os escolares, que acudirán á exposición cos centros educativos para coñecer máis sobre a Historia de España e sobre a evolución dos seus símbolos.

Pensando nos rapaces, pero tamén no público en xeral, a asociación apoia a mostra cun catálogo que explica todas as pezas que se poden observar, así como cun vídeo, que se proxectará no salón do Museo todas as mañás, ás 12.00 horas, e polas tardes ás 19.00 e ás 20.00 horas, para todos aqueles que teñan interese en coñecer máis a fondo o contido da exposición.

A idea desta mostra xurdiu no seo da asociación “o ano pasado, cando se celebrou o 175 aniversario da unificación da bandeira española”. Dende aquela, a mostra estivo de maneira itinerante en distintos museos do país. Agora, o obxectivo do colectivo é poder crear en Burgos o primeiro Museo da Bandeira de España, polo que Marín será o derradeiro sitio no que se poderá visitar esta exposición de maneira completa.

A inauguración da mostra será o venres, ás 19.00 horas no Museo Torres.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies