Contacto | Tel.:986 88 03 00

Ramallo mantén unha Xunta de Portavoces para avaliar a situación sanitaria na vila

28 xaneiro 2021

A alcaldesa, María Ramallo, presidiu á no Concello de Marín unha Xunta de Portavoces, na que participaron o concelleiro Manuel Santos, polo grupo do Partido Popular; Manuel Pazos, polo PSdG-PSOE de Marín, e Lucía Santos, polo BNG de Marín.

A xunta convocouse co ánimo de compartir co resto de grupos da Corporación municipal a situación actual no noso concello relativa á pandemia do coronavirus e tomar unha serie de decisións que afectan ao día a día municipal.

Así, tal e como explica a rexedora, “decidiuse que os órganos colexiados das Comisións Informativas e o Pleno da Corporación quedarán de momento postergados até que pasen estas dúas semanas nas que estarán vixentes estas novas restricións”. No caso de que pasado este tempo se manteña a situación nesta gravidade, comezarán a celebrarse de novo de xeito semipresencial, apoiándose nas ferramentas telemáticas.

Por outra banda, a alcaldesa facilitou aos portavoces toda a información que se ten sobre a pandemia na vila e resumiulles as medidas tomadas de xeito directo polo Goberno local, como o peche das instalacións deportivas e das casas de cultura e locais municipais, que xa estaba vixente desde hai meses, ou as axudas a nivel financeiro, coa bonificación de taxas para os establecementos que teñan que estar coa súa actividade pechada.

No que respecta ás axudas económicas aos sectores afectados, Ramallo insistiu en que o Concello está disposto e a favor de establecer un Fondo Covid19 conxunto, xestionado pola Xunta de Galicia, coa cofinanciación de todas as administracións porque, “tal e como xa expresei noutras ocasións, é fundamental que actuemos de xeito coordinado para canalizar mellor a axuda, de tal modo que sexa efectiva”.

Asemade, preguntada por se é posible realizar un cribado masivo na poboación marinense, Ramallo explicou que se lle consultou ao SERGAS esta posibilidade, explicando a autoridade sanitaria que só se están a realizar estes dispositivos nos concellos que teñen unhas incidencias acumuladas de máis de 1.000 casos por cada 100.000 habitantes, “e nós afortunadamente de momento estamos lonxe diso”.

No que respecta á información que se está a trasladar á cidadanía, a alcaldesa lembra que están habilitados de xeito continuo os teléfonos da Policía Local e de Servizos Sociais, así como as redes do Concello, nas que se trata de resolver toda dúbida que se prantexa por parte da veciñanza.

Unha das cuestións que tamén aclarou a alcaldesa foi a relativa á contabilización de casos activos no Concello, nos que, ante as dúbidas suscitadas, Ramallo aclarou que non computan os da Escola Naval Militar, xa que non teñen o seu médico de cabeceira na nosa vila. “A Escola ten o seu estrito protocolo, que obriga á realización periódica de test de antíxenos ao alumnado e que lles impide saír da Escola máis alá que para a realización de recados e de trámites esenciais”, afirmou a rexedora.

 

 

 

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies