Contacto | Tel.:986 88 03 00

Valoradas cinco zonas semiurbanas para colocar composteiros comunitarios en Marín

O Concello de Marín segue avanzando no seu obxectivo de incorporar a compostaxe á xestión dos residuos biodegradables da veciñanza de Marín. Para iso, durante este ano adheriuse ao Plan Revitaliza da Deputación de Pontevedra, administración ca que está a deseñar as ubicacións ideais para estes elementos de reciclaxe.
Segundo adiantou a concelleira de Medio Ambiente, Marián Sanmartín, os composteiros comunitarios colocaranse en zonas semiurbanas, “nas que haxa unha maioría de casas unifamiliares con espazos verdes, onde é máis demandado e utilizable o compost que se xerará nos composteiros”.
De maneira preliminar, o Goberno local está valorando colocar varios destes elementos nos entornos do Sequelo, Barriadas de San Pedro, de Mogor, da Cañota ou en Cantodarea. Crearanse, por tanto, nestes espazos o que se coñece como Centros de Compostaxe Comunitaria, é dicir, unha instalación pensada para prestar servizo a pequenas comunidades de veciños nas que se produzan residuos de material orgánico e biodegradable.
Deputación e Concello seguirán perfilando este plan de compostaxe comunitaria, que se irá desenvolvendo ao longo do próximo 2020.

Compostaxe individual de Sogama
Aínda que esta será a primeira vez que se instalen composteiros comúns na vila marinense, esta forma sustentable de xestionar os biorresiduos non é nova para o municipio, dado que 100 composteiros individuais de Sogama xa levan un ano en funcionamento en diversas casas marinenses, especialmente do rural, na zona de Pardavila.
Tal e como explica Sanmartín, a ano pasado repartíronse cen composteiros individuais “que colleitaron moito éxito entre aqueles que os solicitaron a través da Asociación de veciños da Pardavila”. Tanto é así que a demanda destas instalacións foi a máis, polo que o Goberno local anuncia que se pediron outros cen composteiros máis.
“Xa tramitamos a petición ca Consellería de Medio Ambiente, concretamente con SOGAMA e recibirémos os composteiros unha vez pase toda a época do Nadal”, afirma Sanmartín.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies