A Avenida de Ourense, en plena transformación para apostar por unha mobilidade urbana sostible

A Avenida de Ourense, en plena transformación para apostar por unha mobilidade urbana sostible

Camiñar, pasear, pedalear, gozar do espazo urbano da nosa vila. Marín atópase inmersa na súa remodelación para converter o corazón da vila nun lugar no que as persoas sexan as protagonistas.

A Estratexia De Desenvolvemento Urbano Sostible Marín 2020, cofinanciada nun 80% polo Fondo Europeo de Desenvolvemento Rexional da Unión Europea, ten tres grandes proxectos en carteira: a construción do Auditorio, do que se está a redactar o proxecto definitivo por parte de Naos; a remodelación do Paseo Alcalde Blanco, para aproveitar esta directa vía de achegamento ao mar, e a humanización da Avenida de Ourense, convertendo a principal arteria de comunicación da vila nun lugar de coexistencia para os peóns, os ciclistas e o tráfico rodado.

A alcaldesa, María Ramallo, acompañada dos edís de Urbanismo e Medio Ambiente, Manuel Santos e Marián Sanmartín, visitaron esta mañá o inicio dos traballos, que están a ser executados por Oresa, nos que xa se comezou a botar o formigón no espazo que destinado ao carril bici.

O proxecto contempla diferentes distribucións do espazo urbano. Nun primeiro tramo, co inicio en Cantodarea, habilitarase unha beirarrúa de 2 metros de ancho, unha senda peonil de 3,5 metros e o carril bici, de 3 metros. Despois haberá unha vía coexistente para os peons e o carril de 3 metros de ancho en total e finalmente, entre o Concello e a Praza de España, o espazo distribuirase en 3 metros de beirarrúa e 2,5 metros destinado ao carril das bicicletas.

“Trátase dunha humanización integral”, asegurou esta mañá a alcaldesa a pé de obra, “coa que conseguiremos unha Avenida de Ourense cómoda e sostible para todos”. Tamén para o medio ambiente, xa que, tal e como recordou a rexedora, “adxudicouse un lote específico para a renovación de todo o alumeado, que pasará ter tecnoloxía LED, o que redundará nun importante aforro enerxético”.

“Marín 2020 é un proxecto global, unha intención de transformar o noso espazo urbano máis céntrico aproveitando as oportunidade de inversión que nos brindan os Fondos Europeos”, engadiu Ramallo.

En total, a inversión para esta humanización ascende a 1,5 millóns de euros.

Unha transformación por dentro e por fóra

As humanizacións urbanísticas que se levan a cabo na nosa vila teñen, na maioría dos casos, un dobre plano. Por unha banda, mellórase a estética e os materiais urbanísticos da rúa e, por outra, renóvase todo o que ten que ver cos servizos.

Neste caso, a Avenida de Ourense está a piques de rematar coa súa “transformación interior”. A obra do colector xeral, acometida por Augas de Galicia, organismo dependente da Xunta de Galicia e enmarcada no Plan de Saneamento da Ría de Pontevedra, ten previsto o seu remate a finais do mes de setembro.

De feito, ambas empresas executoras están coordinadas para que ambas actuacións avancen de xeito paralelo sen problemas até a finalización total da renovación do colector.

Anterior Comezan os traballos de mellora do firme do camiño rural que une Troncosa e Candóns

WEBS ASOCIADAS

CONTACTO

Avda. Ourense s/n

2022 Concello de Marín. Todos los derechos reservados