Con esta aprobación definitiva, a céntrica parcela poderá desenvolverse no futuro, creando novos edificios e permitindo a apertura dun novo vial entre a Rúa da Estrada e Fondo do Saco, con 27 novas plazas de estacionamento
Marín, 25 abril 2025
A alcaldesa, María Ramallo, informou esta mañá de que a Xunta de Galicia vén de aprobar definitivamente a modificación puntural do PXOM que se tramitou desde o Concello e que afecta ao solar da zona de Méndez Núñez. Esta modificación iniciouse tras a sentenza do TSXG, que avalou que esta parcela é un chan urbano non consolidado, polo que permite levar adiante unha futura remodelación urbanística.
O inicio desta modificación levouse a Pleno en setembro de 2022 e desde entón traballouse seguindo todo o proceso administrativo que supón modificar un PXOM. Dentro dese proceso, recibiuse unha alegación, que foi estudada e finalmente desestimada, e a maiores pedíronse ata 12 informes técnicos e xurídicos das administracións competentes nesta materia, desde Carreteras á Dirección Xeral de Patrimonio, pasando por Costas e polo equipo técnico municipal, entre outros.
Todos eses informes favorables resultaron favorables e o Pleno da Corporación deu luz verde á aprobación incial, para despois derivarse á Xunta de Galicia, que é a administración que ten competencia para aprobar de forma definitiva estas modificacións.
Este paso tan importante permitirá o desenvolvemento futuro da parcela, que ocupa toda unha mazá urbana na que se incluirán:
● Unha área dotacional privada, correspondente co espazo que ocupa o CPR La Inmaculada
● Un equipamento público, que poderá ocupar algo máis de 670 metros cadrados
● Unha zona residencial, na que se poderá construir un edificio de 59 vivendas, cunha extensa zona verde
● A apertura dun vial que conectará a Rúa da Estrada con Fondo do Saco, que suporá a creación de 27 novas prazas de estacionamento
