Contacto | Tel.:986 88 03 00

Marín abordará unha importante batería de proxectos que se financiarán co remanente

09 xuño 2021

A crise sanitara supuxo un importante aumento das inversións a realizar por parte das entidades locais, como o Concello de Marín, que vén realizando un importante esforzo de xestión económica para poder facer fronte a moitos dos gastos sobrevidos e, sobre todo, para poder continuar coa prestación de servizos públicos de calidade e a consecución de obras públicas.

Ante esta situación, o Concello usará parte do seu remanente de Tesourería para avanzar na consecución de importantes proxectos. O Pleno da Corporación tratará esta inversión de maneira global, que ascende a 877.135,02 euros, que se repartirán da seguinte maneira:

A) Colector de augas residuais entre os núcleos de Pastoriza e Picotes – 199. 985,71 €

Tal e como explica o Concello, a depuradora de Pastoriza leva tempo arrastrando unha serie de problemas que fan “necesario e moi urxente” esta obra de saneamento, que supón a única alternativa para este núcleo, que así será conectado á rede xeral.

Esta actuación segue a liña da mellora do saneamento en todo o municipio. Nos últimos anos, son numerosos os proxectos de renovación que se levaron a cabo tanto no rural como no casco urbano, aproveitando humanizacións, e é especialmente relevante a posta en funcionamento do novo colector da Avenida de Ourense, esencial para evitar verquidos indesexados á ría.

B) Rede de abastecemento no núcleo de Bexe – 161.962,12 €

Trátase, igual ca no caso anterior, dun gasto que non entende de demoras debido ás dificultades que se producen na subministración deste servizo. De novo, a extensión do núcleo á rede comunitaria permitirá subsanar as situacións de escaseza.

C) Demolición do antigo Mercado de Cantodarea e acondicionamento do solar – 138.230,34 €euros

Cantodarea poderá dicir adeus a un dos históricos inmobles sen uso para poder dar a benvida a una nova praza que permita crear un espazo para o goce da cidadanía. A demolición do Antigo Mercado é precisa polo enorme deterioro que presenta a infraestrutura e suporá o adecentamento e a limpeza da zona, non só por cuestións estéticas, senón tamén de salubridade.

D) Creación dun centro de ocio xuvenil e centralización do arquivo municipal no antigo Liceo Casino – 376.956,85 €

A mocidade precisa de espazos adicados ao seu ocio e á súa capacidade de aprendizaxe na nosa vila. Ese é o carácter que marcará o novo Centro de Ocio xuvenil que se proxecta para o antigo Liceo Casino, adquirido polo Concello e no que se precisa realizar unha obra de reforma. Nese inmoble, ademais, habilitarase un arquivo municipal centralizado na planta baixa.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies