Contacto | Tel.:986 88 03 00

Marín seguirá traballando na mellora da calidade urbana coa súa adhesión á Axenda 2030

22 febreiro 2021

Traballar para conseguir unha vila moderna, integrada, avanzada a nivel tecnolóxico e con todas as comodidades para a veciñanza, apostando por un modelo de economía sostible e coidadoso co noso medio ambiente.

Eses son os obxectivos que persegue o Goberno local de cara a crear o Marín que queremos, un Marín cada vez máis aliñado cos obxectivos globais que se traballan desde España e Europa e que procuran que os territorios sexan máis habitables para os veciños e veciñas.

A vila marinense xa leva moito camiñado neste senso grazas á xestión que está a realizar dos Fondos DUSI, a través do proxecto Marín Dusi, cofinanciado nun 80% polo Fondo Europeo de Desenvolvemento Rexional da Unión Europea.

Humanización e dotación de novas infraestruturas para o municipio, aforro enerxético a través da renovación da iluminación pública, recuperación de espazos degradados, posta en marcha dun sistema de Smart Citie para o aproveitamento das novas tecnoloxías… Sobre esas bases está asentada esta estratexia local, que agora contará cun novo programa paralelo, grazas á Axenda 2030.

Tal e como anunciou esta mañá a alcaldesa, María Ramallo, Marín solicitará a adhesión de Marín á Rede de Entidades Locais para desenvolver os Obxectivos de Desenvolvemento Sustentable (ODS) para a Axenda 2030 da FEMP (Federación Española de Municipios e Provincias).

Esta rede está formada polos Gobernos locais que se comprometen a localizar e implementar os ODS da Axenda 2030 de forma transversal nas súas políticas públicas municipais. “Desde Marín, levamos anos traballando para conseguir estes obxectivos de mellora da calidade de vida pública e seguiremos facéndoo, sumándonos a esta nova ferramenta que nos ofrecen ás entidades locais”, aseguro a rexedora.

Con esta adhesión, que será levada ao Pleno da vindeira semana, o Goberno local comprometerase a determinar un conxunto de actuacións, que deberán incorporarse nun Plan de Actuación ou Estratexia Local, no que se inclúa unha análise da situación e un plan de localización e implementación destes obxectivos europeos.

Os obxectivos ODS son os seguintes: fin da pobreza, fame cero, saúde e benestar, educación de calidade, igualdade de xénero, auga limpa e saneamento, enerxía asequible e non contaminante, traballo decente e crecemento económico; industria, innovación e infraestrutura; redución das desigualdades, cidades e comunidades sostibles, produción e consumo responsables, acción polo clima, vida submarina, vida de ecosistemas terrestres; paz, xustiza e institucións sólidas, e alianzas para lograr os obxectivos.

“O camiño que agora debemos facer é o de aplicar ao noso contexto local estes epígrafes, fomentando actuacións concretas que nos axuden a conseguilos desde unha perspectiva municipal”, explicou Ramallo.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies