09 xaneiro 2021
A alcaldesa de Marín, María Ramallo, e o concelleiro de Urbanismo, Manuel Santos, anunciaron, despois de realizar en varias ocasións a petición ao INVIED (Instituto de Vivenda, Infraestrutura e Equipamento da Defensa) para a cesión de terreos na Barriada Virxe do Came, que se acaba de conseguir a firma dun acordo con este organismo para tal fin.
Segundo explica o Concello, este acordo, rubricado entre o director xerente do organismo e a alcaldesa, cede o uso temporal de tres parcelas nesta barriada, na que se ubica o Centro de Saúde, para poder dedicalas a aparcadoiro disuasorio e dar así resposta á alta demanda de estacionamento que ten este área polo movemento que xera a infraestrutura sanitaria.
Dúas das parcelas están ubicadas dentro da propia barriada e a terceira é a que se sitúa fronte á entrada principal do Centro de Saúde. As tres atópanse actualmente sen uso. Segundo o acordo firmado, esta cesión por parte do INVIED será dun ano, prorrogable ata seis anualidades, e a cesión ten carácter gratuíto.
Agora, o Concello será o encargado de asumir os gastos de acondicionamento, conservación e limpeza que as parcelas requiran. Segundo os cálculos do Goberno local, dotarase á zona de cerca de 30 novas prazas de estacionamento.
“Trátase dunha boa nova”, asegurou a alcaldesa, “xa que esta cesión permitirá que ordenemos mellor os fluxos de tráfico e estacionamento nunha zona na que a densidade de movemento é elevada pola propia actividade do Centro de Saúde”.
Asemade, o concelleiro de Urbanismo Manuel Santos quixo poñer en relevo “o importante traballo que se está a realizar desde o Goberno local para tratar de conseguir novos espazos de estacionamento disuasorio por todos os puntos do centro urbano, que permitan deixar o coche nun espazo seguro, cómodo e a apenas uns minutos das principais rúas da vila”.
