05 febreiro 2021
O Concello de Marín levou a cabo a tala do exemplar de Sequoia sempervivens que, despois de ser estudada por técnicos de diversas entidades e cos informes derivados desa análise, presentaba un importante estado de deterioro, unha parte do seu sistema radical morto, que comprometía a súa estabilidade e, por tanto, supoñía un perigo para viandantes e as infraestruturas que hai ao seu redor.
De feito, os temporais dos últimos días incrementaban este risco e por iso, despois de que os técnicos avalasen a tala do exemplar como “a opción máis coherente coa situación fitosanitaria”, o Concello encargou estes traballos, que se executaron na mañá de hoxe.
A concelleira de Parques e Xardíns, Cristina Acuña, explica que foi unha decisión “sopesada e tomada segundo os criterios técnicos”. Durante o proceso de tala, ademais, evidenciouse que máis do 30% do interior do tronco non tiña savia, polo que a situación do exemplar estaba moi comprometida.
