A Mesa de Contratación fai unha proposta de adxudicación para a construción do Auditorio

17 decembro 2021

 A alcaldesa de Marín, María Ramallo, informou este mediodía da proposta de adxudicación realizada pola Mesa de Contratación para o proxecto de construción do Auditorio de Marín. A Mesa valorou a oferta da empresa Citanias, á que agora se lle requerirá a documentación correspondente.

Unha vez a firma empresarial acepte a proposta e presente a documentación, será o Pleno da Corporación o que aprobará a adxudicación definitiva. A partir de entón, comezará a contar atrás para o inicio das obras que dotarán a Marín dun Auditorio que marcará un antes e un despois nas posibilidades culturais do municipio.

A proposta de adxudicación fíxose por un importe de 4.305.384,12 euros (IVE incluído). A obra está cofinanciada polo Fondo Europeo de Desenvolvemento Rexional (FEDER) da Unión Europea, a través de Marín Dusi, cunha inxección de 2 millóns de euros. Outros dous millóns de euros serán aportados pola Xunta de Galicia, a través dun convenio de colaboración coa Consellería de Medio Ambiente. O restante será aportado polo Concello a través dun préstamo.

Na oferta presentada por Citanias, valoráronse, entre outras cousas, o coñecemento do espazo no que se levantará o edificio, a previsión dos accesos e da circulación de vehículos e peóns, as técnicas construtivas e as calidades propostas, así como as análises realizadas pola empresa licitadora desde o punto de vista medioambiental.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies