Comezaron os traballos de renovación da pavimentación da estrada Marín-Aguete, comunmente xa coñecida como viario de praias. O intenso uso que soporta este viario, especialmente nas épocas estivais, afectou ás características do pavimento, polo que se produciron diversas deficiencias co paso do tempo, que precisan dunha posta a punto.
Así, a empresa Construcciones, Obras y Viales S.A. (COVSA), que resultou adxudicataria do proxecto, está a realizar toda esta renovación da rodadura, nunha superficie de 8.318,70 metros cadrados de superficie, anexo ao paseo marítimo de Aguete. Ademais da renovación da pavimentación, volverá implantarse a sinalización adecuada, tanto horizontal coma vertical, para o tránsito rodado e tamén para o estacionamento.
Por outra banda, realizaranse traballos de desbroce e limpeza das marxes da vía, retirando aquela maleza, escombro ou calquera tipo de material indesexable que estea a ocupar estee espazos.
O orzamento total investido nesta actuación será de 91.853,29 euros (IVE incluído), que se subvencionará con cargo ao Plan Concellos 20.18-2019 da Deputación de Pontevedra. O prazo de execución será dun mes, aproximadamente.
