Manuel Torres como nunca antes: unha xornada para redescubrir ao renovador descoñecido da arte pictórica galega do pasado século

A concelleira Itziar Álvarez e o membro do Consello da Cultura Galega, escritor e comisario, Ramón Rozas, presentaron a xornada que terá lugar en torno á figura plástica máis importante de Marín o 17 de xuño no seu museo

Marín, 06 xuño 2025

Laxeiro, Colmeiro, Souto, Maside… e si, Torres. O quinto Beatle, como di o escritor e comisario Ramón Rozas, desa xeración plástica coñecida como Os Renovadores, que nos anos trinta do pasado século incorporaron as achegas das vangardas históricas á pintura galega. A figura do noso pintor máis relevante será posta en valor da man do Consello da Cultura Galega, cunha xornada na que redescubrir a obra de Manuel Torres, que se celebrará o 17 de xuño de 17.00 a 20.00 horas e que foi presentada pola concelleira Itziar Álvarez e polo propio Rozas.

A actividade enmárcase dentro do ciclo “Revisando a nosa arte”, imulsado polo organismo autonómico, e ten por obxectivo poñer en valor e revisitar a traxectoria creativa do pintor marinense, que pode situarse á altura do resto de pintores galegos antes mencionados e que acadon máis fama que o artista local.

Na xornada participarán varios relatores, que irán centrando as súas conferencias en distintos momentos da vida de Torres, analizando o contexto social, político e económico e como este tivo a súa pegada no seu desenvolvemento artístico.

Un deses relatores será Carlos L. Bernández, comisario de exposicións, crítico de arte e académico da Real Academia Galega de Belas Artes, que se centrará na primeira parte da traxectoria de Torres, entre 1927 e 1936, onde entra en contacto coas experiencias pictóricas en Madrid e París, o que marca a súa decidida participación nos aires de cambio da pintura en Galicia e como despois segue a súa traxectoria nun contexto bélico.

Despois, Ramón Rozas centrará a súa intervención nesa posguerra e no exilio ulterior en Marín, un caso insólito fronte ao dos seus compañeiros de xeración, que, por distintas circunstancias, desenvolveron a súa vida e obra en diferentes latitudes.

Rematará a xornada, cunha mesa redonda á que se incorporarán, ademais dos dous relatores, Antón Sobral, pintor de Marín cunha relación persoal co propio Manuel Torres, e Ángeles Tilve, directora do Museo de Pontevedra, onde se gardan varias das súas pezas artísticas máis relevantes.

A entrada á xornada é completamente libre e sen inscrición ata completar aforo.