O Concello impulsa un proxecto para poñer en valor o CIP de Mogor e a súa contorna cunha inversión de 32.442 €

15 xaneiro 2022

A posta en valor e a protección dos recursos patrimoniais existentes no litoral costeiro, como é o caso do conxunto arqueolóxico dos petroglifos de Mogor, contribue á divulgación da prehistoria de Marín, das formas de vida das primeiras comunidades pesqueiras das que se ten coñecemento, enriquece o roteiro do litoral xa existente e se configura como un foco de difusión do patrimonio cultural costeiro da bisbarra, ademais de complementar a oferta turística do municipio, contribuindo á desestacionalización da devandita oferta turística.

Por iso, o Concello de Marín impulsa un proxecto de posta en valor do conxunto arqueolóxico dos petróglifos de Mogor, co que dotalo de equipamento musográfico, realizar un levantamento fotogramétrico e por láser escáner das rochas gravadas e para mellorar toda a iluminación da área arqueolóxica.

A concelleira de Turismo, Cristina Acuña, explicou que se trata dun proxecto “co que aproveitar o enorme potencial do noso patrimonio arqueolóxico” e indicou que conta cun orzamento de cerca de 32.442 euros, “para os que solicitamos unha subvención dentro das liñas do GALP”.

No que respecta á proposta museográfica, búscase renovar a parte expositiva do interior do Centro de Interpretación, cunha proposta moderna, que contará con medios técnicos e actuais. A interpretación arqueolóxica será a base desta
proposta museográfica que ten como obxectivo facer que os petróglifos sexan lexibles para o público que os visite.

O labirinto, probablemente o símbolo máis coñecido dos petróglifos de Mogor, será o elemento que vertebre o discurso narrativo que se poderá ler nos paneis e no resto de soportes informativos.

A parte audiovisual tamén será protagonista, coa creación de pezas, coma fotografías aéreas e vídeos que permitan situar aos visitantes e aportarlles información relevante acerca dos petróglifos.

Por outra banda, no que respecta á iluminación exterior estará pensada para mellorar a percepción dos gravados durante o día e apoiarase nalgúns puntos de luz específicos para as visitas nocturnas, un dos maiores atractivos do CIP. Ademais, prevese a instalación de sinalización vertical con información básica para aqueles visitantes que se acheguen até Mogor cando o CIP estea pechado.


Fotogrametría para descubrir os segredos dos petróglifos

A parte máis innovadora do proxecto ten que ver cos levantamentos fotogramétricos dos gravados que se inclúen, co obxectivo de obter unhas representacións máis precisas e completas dos petróglifos.

Tal e como explica Acuña, “o uso do láser escáner permitirá obter modelos 3D que despois poderemos empregar na disfusión do noso conxunto arqueolóxico máis importante”.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies