Volven a Briz os obradoiros de envellecemento activo e o Centro Terapéutico

5 setembro 2022

A Finca de Briz volve acoller este ano os Obradoiros de Envellecemento Activo, organizados por Afapo (Asociación de Familiares de Enfermos y otras Demencias de Pontevedra) en colaboración co Concello de Marín na Finca de Briz, onde está tamén en funcionamento o Centro Terapéutico.

A concelleira de Benestar Social, Marián Sanmartín, e o presidente da entidade social, Jose Manuel Fontenla, pecharon esta semana os detalles de inicio da actividade, da que se poderán beneficiar ata 43 usuarios e usuarias, 22 nos obradoiros e 21 no centro.

Os potenciais usuarios son persoas a partir dos 55 anos de idade que carezan de diagnóstico de enfermidade neurodexenerativa, xa que o obxectivo fundamental deste obradoiro é o de previr a aparición deste tipo de patoloxías, fomentando o envellecemento activo.

Levaranse a cabo traballos grupais con distintas técnicas que fomenten a cohesión entre as persoas, a sociabilidade, a diversión, o coñecemento mutuo e o traballo en equipo. Ademais, realizaranse exercicios cos que traballar a memoria, a linguaxe, a escritura, o cálculo, a atención, a reminiscencia e outras funcións.

Os obradoiros realizaranse dous días á semana, os luns e os mércores, cunha duración dunha hora e media cada sesión.

Ademais, a concelleira de Benestar Social adiantou que a partir deste mes o Goberno local traballará para poder ofrecer un servizo semellante ao dos obradoiros de envellecemento activo na Casa de Cultura de Sexio, “xa que sabemos que hai unha importante demanda”.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies