Contacto | Tel.:986 88 03 00

Arranca a Semana da Solidariedade para poder celebrar este Nadal de xeito equitativo e digno

A concelleira de Benestar Social, Marián Sanmartín, mantivo esta mañá una reunión con representantes das ONGs da vila e coa asistenta social para facer balance da situación no municipio e para coordinar a campaña de Nadal no inicio da Semana da Solidariedade.

Desde hoxe e ata o venres, celébrase estes días unha semana na que Concello, ONGs e centros educativos traballan xuntos para que estas festas, que serán máis íntimas ca nunca, poidan ser gozadas por todas as familias, independentemente da súa situación económica.

Por iso, o alumnado poderá levar ao seu centro educativo durante toda a semana alimentos non perecedoiros, produtos típicos destas festas e produtos de limpeza e hixiene persoal, que ao finalizar a semana serán recollidos por persoal do Concello para logo poder repartir todo o recadado de xeito equitativo entre as distintas organizacións solidarias da vila.

“Este ano precisamos máis ca nunca axudar e colaborar, porque a situación de crise sanitaria tamén se está a converter nunha fonda crise económica que afectará a moitos fogares”, expuxo a concelleira, polo que tanto ela como os representantes das organizacións solidarias animan a toda a veciñanza “a participar e aportar o seu grao de area”.

Ademais, o Concello aportará unha axuda de máis de 4.000 euros para potenciar esta campaña de Nadal entre os usuarios das organizacións.

Cerca de 300 unidades familiares asistidas

Tal e como se analizou durante a sesión de traballo, durante estes meses notouse “un aumento das familias que precisan de asistencia social, debido na gran maioría dos casos a cambios na situación laboral e económica derivados da situación sanitaria provocada pola Covid19”.

Sumando a todas as asociacións, en total estase prestando asistencia a cerca de 300 familias.

Unha axuda anual de 13.500 euros

Ademais das axudas puntuais para determinadas campañas, como esta de Nadal, o Concello aporta ás ONGs municipais unhas subvencións nominativas que cada ano axudan a estas organizacións a afrontar xestións e outros gastos derivados da súa actividade, que é esencial.

En total, estas subvencións suman 13.500 euros anuais de axuda directa á asistencia social.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies