Marín terá un autocine, unha experiencia única ligada ás compras no comercio local da vila

Marín terá un autocine, unha experiencia única ligada ás compras no comercio local da vila

O Concello, a través das Concellarías de Cultura e de Turismo, vén de anunciar que a nosa vila contará cun autocine o próximo 10 de outubro, unha iniciativa coa que se busca ofrecer unha experiencia cultural única aos consumidores máis fieis do comercio e da hostalaría locais da nosa vila, xa que as entradas conseguiranse acumulando, de aquí ao 7 de outubro, un total de 50 euros en tickets de compra.

As concelleiras de Cultura, Beatriz Rodríguez, e de Turismo, Cristina Acuña, presentaron esta mañá a actividade, explicando que se trata de crear “unha campaña de dinamización comercial coa que poidamos axudar aos nosos comercios e locais a manter a súa actividade económica en momentos complexos como o que estamos a vivir”.

A campaña está ligada á plataforma de dinamización dixital da economía local Marín en Rede. De feito, será nos máis de 140 establecementos adheridos a esta plataforma nos que os marinenses poderán realizar as súas compras para ir sumando gasto até completar o necesario para conseguir unha entrada.

“Desde hoxe e até o mércores 7 de outubro, aqueles que queiran conseguir unha entrada terán que gardar os tickets das compras que realicen nos establecementos adheridos a Marín en Rede. Unha vez acaden os 50 euros de gasto, poderán completar o formulario que atoparán na páxina web de Marín en Rede, onde terán que poñer os seus datos, a matrícula do coche co que se asistirá ao autocine e adxuntar unha foto de cada un dos tickets. Unha vez feito isto, recibirán a súa entrada para o autocine”, explicou a edil de Cultura.

[button link=”https://www.marinenrede.com/autocine/” size=”large” color=”blue”]Consegue a túa entrada[/button]

Cada entrada correspóndese cun vehículo, habendo un aforo máximo na Praza do Regueiro para 80 coches. As entradas dispensaranse por orde de inscripción dos formularios até que se remate o aforo. O gasto comercial pode facerse nun único ticket ou en varios e o mesmo acontece cos locais, pode ser un gasto realizado nun único establecemento ou en varios dos adheridos a Marín en Rede.

Durante os últimos días, estes establecementos foron recibindo uns adhesivos identificativos co logotipo de Marín en Rede. Estas pegatinas seguirán repartíndose, aínda que o Concello insta a todos aqueles locais que aínda non a teñan a pasar polo departamento de Alcaldía do Concello para recoller a que lles corresponde e poder pegala nos seus escaparates.

Tanto os comerciantes como os clientes que poidan ter dúbidas con respecto á campaña, poderán escribir un email a contacto@marinenrede.com.

 

Anterior A Mesa de Traballo Contra a Violencia de Xénero analiza os datos desta lacra no municipio, con 29 casos activos

WEBS ASOCIADAS

CONTACTO

Avda. Ourense s/n

2022 Concello de Marín. Todos los derechos reservados