O Concello prepara unha batería de iniciativas para axudar aos establecementos comerciais durante o Nadal

O apoio á economía local é fundamental de cara aos tempos de crise que están por vir, dada a situación sanitaria na que nos atopamos. Os concelleiros Manuel Santos e Cristina Acuña presidiron a Mesa Local de Comercio, na que participaron representantes do resto de forzas políticas da Corporación e das distintas asociacións comerciais.

Desde o Concello, trasladouse a intención do Goberno local de encarar o Nadal con diversas propostas e campañas que axuden á economía da vila a resistir nestes momentos tan complexos.

Por unha banda, xa está en marcha a elaboración dunha guía na que se inclúan todos os servizos de recollida en local e de levar a domicilio que están poñendo en marcha os locais de hostalaría da nosa vila para este mes no que teñen que estar coas portas pechadas ao público.

A través da web de Marín en Rede, poderá consultarse toda a información de xeito rápido para poder apoiar á nosa hostalaría facendo pedidos de comida para levar durante as próximas semanas. Tamén se repartirán carteis para que os comercios poidan mostrar esta información á veciñanza que acuda a realizar as súas compras.

No que respecta de xeito directo ao Nadal, o Concello reafirma a súa intención de apostar “por unha iluminación acorde a esta situación, que cre ese ambiente de Nadal que todos precisamos, tamén os nosos comercios”.

As luminarias acompañaranse, tal e como se expuxo na Mesa Local, de diferentes elementos fixos de decoración en espazos referentes do casco urbano e do rural: Alameda, Palco da Música, Parque Eguren, a Igrexa Vella, a Praza da Capirota, a Finca de Briz ou o Mercado de Seixo. Outra das opcións que se puxo sobre a mesa é a posibilidade de programar un fío musical, unha iniciativa que o Goberno local xa adiantou que se estudará.

Asemade, estase a traballar nas bases dun concurso no que involucrar á veciñanza para que decoren de xeito navideño os portais, os balcóns e as vivendas unifamiliares. Os premios, tal e como aconteceu no concurso fotográfico de Samaín, serán vales regalo para gastar nos comercios e locais da nosa vila adheridos á plataforma dixital Marín en Rede. Nos próximos días, publicarase máis información sobre as bases con todos os detalles concretos do concurso.

Acuña e Santos trasladaron tamén que o Goberno local está a piques de presentar unha campaña de cara ás datas centrais de Nadal que suporá unha incentivación directa do consumo.

A nivel audiovisual, estase a preparar unha peza que servirá para artellar a mensaxe máis importante que se pode dar a nivel local neste momentos: #ApoiemosONoso, unha mensaxe que xa se deu desde o primeiro momento no que se lanzou o proxecto de Marín en Rede, cofinanciado a través da EDUSI Marín 2020, cofinanciada co Fondo Europeo de Desenvolvemento Rexional (FEDER) da Unión Europea.

 

Máis alá do Nadal

O Concello tamén é consciente de que os meses que vaian máis alá da época de Nadal serán “moi duros”. Por iso, e despois da boa acollida que tivo o formato de feira Stock Marín, que se organizou con Estrela de Marín o pasado verán, o Concello propón que se faga unha feira similar de cara á primavera do 2021.

Por outra banda, a pasada semana o Concello puxo en marcha o expediente de contratación do Plan Reactiva Marín, que ofrecerá un servizo de formación e asesoramento a cerca de 30 negocios da vila que cumpran os requisitos do programa e que centrarán os contidos na mellora da imaxe de negocio, na adopción de aptitudes a nivel dixital e no manexo de diferentes ferramentas indispensables para ser competitivos no mercado actual.

 

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies