Contacto | Tel.:986 88 03 00

MARES, estacionamento público gratuíto

16 abril 2021

Proxecto MARES

O proxecto MARES é “a aposta integral do Concello para ordenar o espazo de aparcadoiro público gratuíto do que dispoñemos na vila, a través dos aparcadoiros disuasorios e da nova ordenanza de regulación do tempo de estacionamento en determinadas rúas comerciais, que pronto se comezará a aplicar”.

Así presentou esta mañá a alcaldesa, María Ramallo, esta estratexia elaborada nos últimos meses coa que facilitar á veciñanza e aos visitantes e xente que vén traballar a Marín toda a información precisa para poder utilizar correctamente cada área de estacionamento e para fomentar a mobilidade a pé dentro do municipio sempre que sexa posible.

Desde hai varios anos, o Goberno local está a traballar intensamente na dotación no centro urbano de aparcadoiros públicos gratuítos, que están destinados ás persoas que deixan o seu vehículo aparcado durante varias horas. En total, existen 12 aparcadoiros disuasorios (dos dos cales están aínda a piques de rematar a súa habilitación como tal na Urbnización Virxe do Carme).

“Temos posibilidade de deixar o noso coche nos aparcadoiros públicos da Praza do Regueiro, en Sagrada Familia, en Ponte Zapal, na contorna do Centro de Saúde e do Sequelo, na República Arxentina, en Jaime Janer, en Concepción Arenal…”, enumerou a rexedora, que engadiu que nesta última rúa “realizamos unha humanización coa que se mellorou moitísimo a fisionomía deste vial e á que dotamos de 100 prazas nun aparcadoiro público para así paliar as prazas perdidas polo ancheamento das beirarrúas”.

Co obxectivo de que os marinenses e os que veñen de fóra poidan ter localizados todos estes aparcadoiros públicos e saiban canta distancia lles separa camiñando desde cada un deles aos principais puntos de interese da vila creouse un parking minuto, no que se pode ver, por exemplo, que desde o aparcadoiro de República Arxentina apenas nos separan 6 minutos á Casa do Concello e 7 minutos ao Parque Eguren.

“Tratamos de visibilizar que, ao final, todo está máis preto do que parece e que temos que apostar por unha mobilidade a pé que permita desconxestionar as rúas do centro urbano para os aparcadoiros de longa duración. Se vimos traballar a Marín e o noso coche está 8 horas parado, o ideal é precisamente que quede nestas parcelas”, explica a alcaldesa.

Ramallo tamén explicou que non se incluiu o aparcadoiro disuasorio da Praza de España, porque ademais de que ese si que é un aparcadoiro coñecido por todos e todas, “temos que mirar cara o futuro e adiantarnos á obra do Auditorio, que mermará as prazas nese ámbito”.

 

 ZONA 2H, para todo o demais

Precisamente, coa intención de aumentar a rotación e permitir que as rúas máis céntricas da cidade teñan prazas libres para poder facer recados, xestionar algún trámite, tomar un café e, por ende, apoiar á economía local, naceu a ordenanza que regula o estacionamento con horario limitado.

 

A ZONA 2H, que é como se chamará e como se indicará na sinalización vertical, “só regula o tempo que pode estar aparcado un coche nesas rúas, sen ningún tipo de custo. Como xa explicamos no seu momento, non é unha zona azul de pago, senón só de regulación do tempo”. Ese tempo máximo será de 2 horas e se aplicará nas seguintes rúas:

 

  • Av. de Ourense: desde o paso de peóns, fronte ao parque infantil ata a Praza de España
  • Av. de Ourense: desde o paso de peóns, fronte ao parque infantil ata a Rúa Estrada
  • Av. de Ourense: desde o número 90 ao 96
  • Av. Exército e Marina: desde o Mercado ata o Monólito da Liberación
  • Rúa da Ponte: desde a zona de carga e descarga, situada fronte á fonte, ata o cruzamento con Rúa do Sol
  • Rúa Concepción Arenal: desde o cruzamento da rúa Jaime Janer ata a rúa da Roda
  • Rúa Concepción Arenal:o tramo da beirarrúa impar, fronte á EEI O Grupo ata o cruzamento coa Rúa Méndez Núñez
  • Rúa Jaime Janer: desde o cruzamento coa Rúa Concepción Arenal ata a Rúa Busto de Abaixo
  • Rúa do Alcalde Ezequiel Massoni: beirarrúa impar (Parque Eguren), desde o cruzamento coa rúa do Busto de Abaixo ata o cruzamento coa rúa Concepción Arenal

Tal e como indicou a alcaldesa, con respecto á ZONA 2H só queda por realizar os traballos de pintado e de colocación das sinais indicativas, polo que se espera que a súa posta en funcionamento sexa para a primeira semana de maio. “Avisaremos con antelación para que a veciñanza estea informada con tempo”.

Pola súa banda, o xefe da Policía Local, Benigno Blanco, explicou o funcionamento da MCam, o sistema que utilizará o corpo de seguridade control para controlar e vixiar o cumprimento da ordenanza. “Realizaranse dúas pasadas para controlar de xeito directo as matrículas, e se na segunda, feita pasadas as súas horas, a mesma matrícula está no mesmo lugar, tramitaríase a correspondente sanción”.

 

 Próximo proxecto: o parking subterráneo do Parque Eguren

 O proxecto MARES inclúe tamén unha terceira nova que a alcaldesa anunciou esta mañá: o avance dos traballos preliminares para poder dotar ao Concello dun parking subterráneo baixo o Parque Eguren.

“Marín precisa ir na mesma liña que se está a marcar a nivel global, dotando de máis espazo urbano á veciñanza e mellorando a mobilidade e habilitando outros espazos para os coches, por iso cremos que Marín ten que contar cunha infraestrutura coma esta”. A alcaldesa adiantou que xa está avanzado un estudo da viabilidade da parcela, da posible demanda e do coste da construción do parking, “co que seguiremos traballando” ata ter un proxecto definido.

 

 Todo o material, descargable na web

Todos os planos creados co proxecto MARES poderán descargarse facilmente a través da web municipal, no apartado adicado á estratexia: http://www.concellodemarin.es/proxectomares/

Ademais, a veciñanza poderá adquirir o plano completo cos aparcadoiros marcados, os tempos de desprazamento e as rúas incluídas na ZONA 2H nos diveros puntos da localidade: o Concello, o Museo Manuel Torres, a Biblioteca, a Oficina de Turismo…

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies