O futuro do Vial de Praias: un proxecto de renovación para conectar a senda peonil-ciclista e cunha mellora total da accesibilidade

9 outubro 2021

As praias de Marín son unha xoia natural que desfruta toda a veciñanza de Marín, ademais de ser o maior reclamo turístico do noso municipio. Coidalas, vertebralas e traballar pola súa conservación é un dos obxectivos principais do Goberno local.

Por iso, o Concello está a traballar na elaboración dun proxecto de mellora do Vial de Praias, “porque queremos crear unha senda mellor, na que conviva de verdade e con seguridade a xente que pasea, a xente que vai en bicicleta e o tráfico. Queremos poñer en valor todo o noso litorial, un espectáculo natural que desfrutaremos aínda máis se podemos sacar adiante este proxecto”, tal e como explicou a alcaldesa, María Ramallo.

Este proxecto formaría parte do Plan de Turismo Sostible de Marín, que presentou o Concello aos fondos dos Plans Turísticos de Sostibilidade en Destino (PSTD), financiados a través dos fondos europeos Next Generation EU.

Os obxectivos deste proxecto serán a mellora integral do itinerario peonil-ciclista, dotándoo de seguridade, conectándoo coa rede ciclable que se vén de facer no casco urbano de Marín na Avenida de Ourense e mellorando, en xeral, todas as

barreiras de accesibilidade que hai nos accesos ás praias ao longo do trazado do vial. A actuación completaríase coa colocación de aparcadoiros para as bicicletas.

Para que o carril bici sexa seguro, no proxecto plantexarase que teña unha anchura abondo e con dobre sentido de circulación, cunha pavimentación resistente e antideslizante. Por outra banda, mellorarase a iluminación naqueles puntos nos que aínda non haxa iluminación LED, a pesar de que gran parte do viario xa foi renovado neste sentido.

O orzamento global que o Concello calcula que pode investirse no proxecto é de máis de 1.800.000 euros, que dividirse en dúas fases, unha inicial ata Mogor, “que probablemente é a que poderíamos executar no caso de acadar os fondos do Plan Turístico”, e unha segunda até Aguete, para a que se seguirá buscando financiación.

Desde o Concello, a alcaldesa recalca que, namentres se resolve a candidadura do plan, “seguiremos traballando nos estudos previos para poder afinar este proxecto, que queremos que sexa unha realidade nun futuro e poidamos facer do turismo de Marín un referente de calidade, sostibilidade e mobilidade”.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies