O Local Social de Pardavila, cheo de vida e de melloras grazas á asociación veciñal e ao apoio institucional

O Local Social de Pardavila, cheo de vida e de melloras grazas á asociación veciñal e ao apoio institucional

30 novembro 2021

O Local Social de Pardavila é un espazo cheo de vida e de actividades, que pouco a pouco mellora as súas instalacións e que supón o exemplo perfecto da colaboración entre a veciñanza e a administración para poñer en valor estes espazos de dinamización.

A alcaldesa, María Ramallo, acompañada polo edil de Medio Rural, Pablo Novas, visitaron o local coa presidenta da Asociación de Veciños de Pardavila, Elisa Dopazo, e outros representantes do colectivo, para coñecer in situ as obras de mellora que se levaron a cabo grazas a unha subvención de Vicepresidencia da Xunta de Galicia.

A asociación veciñal investiu cerca de 12.000 euros na renovación de seis ventás e catro portas do local, mellorando a regulación térmica do espazo e incidindo así no aforro enerxético, xa que co novo material mellorouse o sellado e o illamento do exterior e se permite tamén unha mellor separación das estancias.

A presidenta do colectivo trasladoulle á rexedora as actividades que se realizan no local, desde clases de ioga a obradoiros de cociña, pasando por campamentos para a rapazada durante o verán ou clases de zumba.

“Manter vivas estas instalacións e usalas para dinamización, ofrecendo actividades para os veciños e veciñas é un mérito das asociacións, ás que tanto desde o Concello como desde outras administracións, neste caso a Xunta, temos que apoiar, para que poidan renovar os seus espazos, comprar mobiliario, seguir realizando a súa actividade… En definitiva, para que sigan sendo o motor da vida social e comunitaria no noso rural”, declarou a rexedora.

De feito, a alcaldesa aproveitou para comprobar como quedou un dos baños que se renovou con cargo aos fondos municipais, investindo cerca de 2.500 euros, e que agora é moito máis accesible, moderno e confortable.

 

Anterior O Concello volverá sortear 100 tarxetas regalo de 50 euros entre a veciñanza que consuma na economía local

WEBS ASOCIADAS

CONTACTO

Avda. Ourense s/n

2022 Concello de Marín. Todos los derechos reservados