Subvención da redacción do proxecto de humanización da contorna do Mercado de Abastos de Seixo, importe: 50.000 euros.
Os deputados Gregario Agís e Santos Héctor visitaron xunto á alcaldesa de Marín María Ramallo, a contorna do Mercado municipal de Seixo, que, segundo destacaron,”loce xa como novo espazo amable, seguro e inclusivo grazas á actuación de transformación urbana que está a piques de rematar e que conta co financiamento da Deputación de Pontevedra“.
Esta contorna recupera espazos públicos para as persoas, reordenando viarios e mellorando a mobilidade e a accesibilidade na contorna do Mercado. A institución provincial inviste nesta obra un investimento de 730.744 euros, dos que 548.058 euros foron financiados a través do plan ReacPon e os restantes 182.686 euros a través dunha achega do Plan Concellos.
En concreto, a actuación abarca un espazo que comprende un tramo da estrada Grupo Escolar, unha das arterias do núcleo urbano de Seixo, a avenida Otero Ulloa e o Camiño Lanuxe. Nesta contorna, á beira do Mercado de Abastos, xa toma forma unha gran praza pública que se converterá nun lugar de esparexemento e goce do espazo público por parte da cidadanía así como nun lugar adaptado para usos múltiples de lecer.
Xunto á creación desta praza está a reorganizarse o espazo para persoas e para vehículos coa creación de viais de plataforma única e de preferencia peonil, a ampliación das beirarrúas e a eliminación do carril de estacionamento, configurando deste xeito un núcleo máis seguro, accesible, acolledor e respectuoso co medio ambiente. Ademais a obra incluíu as redes de saneamento de augas pluviais e residuais, a de abastecemento e a de iluminación pública, así como a instalación de mobiliario urbano.
